Endringar i fylkestinget
Sigrid Brattabø Handegard tek over som leiar for hovudutval for næring, og Oddmund Klakegg er valt inn som fast medlem av fylkestinget.
Fylkestinget gjorde i møtet 18. mars nyval etter at fylkestingsmedlem Sigurd Erlend Reksnes (Sp) gjekk bort i januar i år.
Nytt fast medlem
Annonse
Nytt fast medlem for Senterpartiet i fylkestinget er Oddmund Klakegg. Han har møtt fast som vara for Aleksander Øren Heen sidan fylkestingsvalet i 2023.
Øren Heen hadde fritak frå fylkestinget sidan han møtte fast i Stortinget medan Erling Sande var kommunal- og distriktsminister. Då Senterpartiet gjekk ut av regjeringa tidlegare i vinter, gjekk Sande tilbake til Stortinget og Øren Heen tilbake til fylkestinget.
Avdøydde Reksnes var fast medlem i hovudutval for samferdsel og mobilitet, og fylkestinget har vald Aleksander Øren Heen som nytt fast medlem for Sp i det utvalet.
Ny hovudutvalsleiar
Annonse
Fylkestinget valde også ny leiar for hovudutval for næring i møtet 18. mars. Sigrid Brattabø Handegard tek over som leiar for Oddmund Klakegg, som har leia hovudutvalet fram til no.
Brattabø har fungert som gruppeleiar for Sp og har møtt fast i fylkesutvalet medan Øren Heen har hatt fritak frå fylkestinget. Øren Heen overtek no som gruppeleiar og har gått inn att som representant i fylkesutvalet.
