Første båtane er på plass i vernebygget
-Her skal vi stille ut tre båtar og fortelje om båtbyggjartradisjonen i Gloppen, seier museumsleiar Anne Kristin Moe ved Nordfjord Folkemuseum. Måndag vart båtane løfta på plass i det nye verne- og formidlingsbygget på Sandane.
Det nye verne- og formidlingsbygget på Øyrane blir reist for å ta vare på Holvikejekta for ettertida, og onsdag skal det unike fartøyet få flytte inn i den nye heimen sin.
Den første båten blir løfta på plass på mesaninen i det nye verne- og formidlingsbygget for Holvikejekta.
Løfta opp på mesaninen
Annonse
Flytteprosessen må skje før den siste veggen i bygningen blir skalka, og måndag vart tre nordfjordbåtar løfta opp på mesaninen i nybygget. Den aller første båten var ein kyrkjebåt frå Fitje, bygd av Anders K. Sande i 1873.
- Dette er ein femkeiping som er nesten ni meter lang. Den neste båten vi skal flytte er Ryssdalskyrkjebåten som vart bygd i 1890, og den siste er ein færing frå 1940. Desse båtane er valde ut fordi dei er bygde på Sørstranda der båtbyggjartradisjonen har stått sterkt heilt fram til i dag, fortel Anne Kristin Moe, og legg til at det er kjekt å kunne vise tre båtar av ulike storleikar.
- Fyller bygget med innhald
- Det må vere litt spesielt å starte innflyttinga i det nye vernebygget?
Annonse
- Dette er heilt klart éin av milepålane i prosjektet som vi har planlagt og jobba med i lang tid. Bygget er så å seie ferdig, og no fyller vi det med innhald. Holvikejekta og dei tre båtane på mesaninen blir bygd inne, seier ho.
- Dette er ein forsmak på det som skal skje onsdag?
- Ja, dagen i dag går med til å flytte dei tre båtane. Viss alt går etter planen, skal jekta på plass i bygget onsdag. Ho skal ikkje heisast, men trillast på skinnegangen som vart nytta då ho vart flytta frå det gamle naustet, seier Moe.
Utstilling på mesaninen
Færingen og dei to kyrkjebåtane blir del av ei utstilling om nordfjordbåtar.
- Nordfjordbåten har hatt fleire funksjonar. Dei båtane vi stiller ut her er til liks med jekta blitt nytta til transport av gjenstandar og menneske, ikkje til fiske. Vi vil òg nytte høvet til å fortelje om båtbyggjartradisjonen i Gloppen, som er heilt spesiell i nasjonal samanheng, seier museumsleiaren.
Annonse
Nordfjord Folkemuseum har fleire nordfjordbåtar i samlinga si.
- Vi har stilt ut tre båtar i Frøysetlada på museet, éin båt har plass i den faste utstillinga vår og no får vi vise fram tre til. Det gleder vi oss over, påpeikar ho.
