Jølster IL feira dei frivillige: – Er berebjelken i idrettsarbeidet
Dugnadsånda og den frivillige innsatsen vart heidra då Jølster Idrettslag inviterte til fest på Skei laurdag.
Publisert
Sist oppdatert
– Vi har lyst til å gi nok tilbake til dei frivillige som står på heile året, seier leiar i Jølster IL, Finn Årdal.
Over 100 personar møtte då alle tidlegare og noverande frivillige i Jølster IL var inviterte til fest på hotellet på Skei laurdag.
Annonse
– Mange stiller på
Denne gong måtte dei verken bake kaker eller stille på dugnad, men fekk kome til duk og dekka bord. Årdal synest jølstringane er flinke til å stille på for idretten.
– Det er ein utruleg stor del av Jølster-befolkninga som er frivillige i idretten på ein eller annan måte i løpet av eit år. Det er heile berebjelken i idrettsarbeidet, seier Årdal.
Ideen til å halde ein fest for dei frivillige, kom opp i samband med at idrettslaget fylte 100 år i fjor.
Annonse
– Det er litt lausrive frå det, men samtidig òg ei markering av at det har vore 100 år med dugnadsinnsats, seier Årdal.
– Enorm samfunnsnytte
Administrerande direktør i Lerum, Trine Lerum Hjellhaug, heldt foredrag under festen. Ho har sjølv ei fortid som fotballspelar, og har engasjert seg i verv i Kaupanger Idrettslag.
Roy Aron Myklebust frå nordsida i Stryn underheldt forsamlinga som reinhaldaren «Lillian».
Festen baud elles på god mat og drikke i salane på hotellet.
Årdal synest det er vanskeleg å slå fast kor mange dugnadstimar som blir lagt ned i Jølster IL i løpet av eit år, men seier det er mange årsverk.
Annonse
– Samfunnsnytta er enorm, og det bidreg til at både vaksne og barn får vere i aktivitet, seier han.
Årdal uttrykkjer takksemd for at så mange vil bruke av fritida si på idretten.
– Det er enkelt å vere leiar når så mange rundt bidreg, seier han.
