Justisministeren lovar å ikkje reversere gjenopning av politistasjonar
Justisminister Astri Aas-Hansen (Ap) lovar at ho ikkje skal fjerne politistasjonane som vart gjenopna under regjeringstida med Senterpartiet.
– Nokre har jo vore redde for at eg skal ta dei vekk, og det skal eg slett ikkje, seier Aas-Hansen til Nationen.
Ho forsikrar at dei gjenopna politistasjonane ligg inne i budsjettet også for 2025 og at det ikkje er nokon planar om å fjerne løyvingane. Samtidig understrekar justisministeren at ho vil leggje stor vekt på faglege råd og tilrådingar.
Annonse
Aas-Hansen fastslår også at ho vil la dagens domstolsstruktur stå. Regjeringa med Arbeidarpartiet og Senterpartiet fekk kritikk frå fagmiljøet då dei gjenoppretta fem tingrettar som vart lagde ned av Solberg-regjeringa under den såkalla domstolsreforma.
Justisministeren seier at ho har fått beskjed av domstolane om at dei no ønskjer stabilitet.
– Dei vil ha ro, og så forheld vi oss til det. Vi konsentrerer oss om å få dette godt på plass, og gjer den jobben som vi skal med høg kvalitet og stor entusiasme, avsluttar justisministeren. (©NPK)
