- Nynorsk fagspråk må ha meir enn honnørord

I rapporten frå Direktoratet for høgare utdanning og kompetanse (HK-dir) om lærebokordninga for høgare utdanning, blir det slått fast at det kjem få søknader om lærebøker på nynorsk. Men i staden for å spørje seg kvifor det er slik, slår rapporten seg til ro med status quo. Det er alvorleg. For dersom lærebokordninga mister sitt språkpolitiske oppdrag – å jamne ut forskjellen mellom bokmål og nynorsk – står vi i fare for å svekkje nynorsk fagspråk ytterlegare.

Heile marknaden for faglitteratur i høgare utdanning er i krise. Dermed blir nesten alle bøker lågopplagsprosjekt – og lærebokordninga blir i praksis ei generell støtteordning for alle. Det var aldri intensjonen. I ein marknad som slit, burde det vere ekstra lønsamt å gi ut bøker på nynorsk. Men i dag er det ikkje attraktivt. 

I språklova frå 2022 står det tydeleg at det offentlege har eit særleg ansvar for å fremje nynorsk som det minst brukte norske skriftspråket. Dette ansvaret må òg gjelde i lærebokpolitikken. Staten må sikre at det blir skrive og gitt ut fagbøker på nynorsk, ikkje berre for å styrkje nynorsk som fagspråk, men for å gi studentar og fagfolk reell språkleg fridom.

Vi treng ikkje fleire rapportar som konkluderer med at det kjem få søknader. Vi treng ein strategi for korleis fleire søknader kan kome. Det krev betre støtteordningar, ein aktiv språkpolitikk, og ei forståing av at jamstilling ikkje skjer av seg sjølv. Det må drivast fram.

Peder Lofnes Hauge - leiar i Noregs Mållag

Olav Opsvik - direktør ved Nynorsk kultursentrum 

Svein Olav Langåker - dagleg leiar i LNK - Landssamanslutninga av nynorskkommunar