Posten åtvarar mot nytt svindelforsøk på SMS

– Dette er rein svindel og har ingenting med Posten Bring å gjere. Vi sender aldri ut SMS eller e-post med lenker til sider der ein skal leggje igjen kortnummer eller annan personleg informasjon, seier kommunikasjonsdirektør Kenneth Tjønndal Pettersen.

Melding som mange har fått, lyder ifølgje Posten Bring som følgjer:

«Pakken din har blitt levert til leveringsområdet, men vi klarte ikke å levere den. Oppdater adresseinformasjonen din. Ellers vil pakken bli returnert».

– Mottakaren blir oppmoda til å svare på meldinga, men bruker ein eit par sekund ekstra, så vil det for dei aller fleste vere lett å sjå at dette ikkje er ein førespurnad frå oss. Dette er kyniske kriminelle som prøver å utnytte deg i ein hektisk kvardag, seier Pettersen.

– Er du usikker på om meldinga du får er svindel, så sjekk i Posten-appen eller nettsidene våre om du har ein pakke på veg, eller ta kontakt med kundeservice, avsluttar kommunikasjonsdirektøren.