Set opp nye fareskilt ved Fløtre

Bakgrunnen for skiltinga er at Statens vegvesen har fått ein førespurnad om å gjere tiltak der vegen har ei skarp kurve ved Fløtre.

Har vore fleire utforkøyringar

I vedtaksbrevet frå Statens vegvesen blir det vist til at det i den aktuelle kurva har skjedd fleire utforkøyringar "som konsekvens av kurveradius og dårleg linjeføring", noko som gjer at kurva kjem overraskande på trafikanten.

Seinast i desember køyrde ein lastebil utfor på staden.

Det er per i dag usikkert kor tid det eventuelt blir gjort større utbetringar på E39 mellom Byrkjelo og Grodås. Derfor er det å bruke trafikkskilt eit aktuelt straktstiltak for å lette noverande situasjon, opplyser Statens vegvesen. 

- Det er vår vurdering at forholda på staden kvalifiserer til oppgradering av skiltinga, skriv vegvesenet i brevet.

Varslar om farleg sving

Statens vegvesen ønskjer å fjerne skilta som står der i dag, og setje opp nye skilt.

Det kjem opp to fareskilt, eitt i kvar retning, som varslar om farleg sving og som bidreg til å framheve linjeføringa i vegen.

- Formålet med skiltet er å redusere overraskingsmomentet når køyrande må gjere plutselege reduksjonar i fart eller retningsendringar, opplyser vegvesenet.

Nye skilt blir òg plasserte ut i svingen for å markere skarpe kurver der trafikantane må redusere farta betydeleg inn mot kurva.

Med høg ulukkesfrekvens, dårleg sikt og linjeføring gjennom kurva vurderer Statens vegvesen det til at det er føremålstenleg med fareskilt med den løysinga vegvesenet har føreslått.

Skilta er tinga hos driftsentreprenøren og kjem truleg om kort tid, opplyser seksjonsleiar Torun Emma Torheim i Statens vegvesen.

Er fullasta med fisk

Lastebilen som køyrde utfor vegen i «Fløtresvingen» på E 39, og vart liggande velta på bøen i dag føremiddag er fullasta med fisk.