Sjoko-sjokk: Kraftig prisvekst på sjokolade
Normalprisen på ei sjokoladeplate har auka til godt over 50-lappen norske butikkar som følgje av dårlege avlingar som truar kakaoproduksjonen i Vest-Afrika.
Ei stikkprøve VG har teke, viser at prisane for ei mjølkesjokoladeplate på 200 gram på tre ulike daglegvarebutikkar i Oslo denne veka var mellom 56,90 kroner og 64,90 kroner.
Til samanlikning kunne ein fått sjokolade til kampanjepris på 27,90 kroner i jula. Den same tilbodsprisen er no 39,90 kroner.
Annonse
Hos Kiwi har normalprisen auka med ti kroner på to månader, som svarer til ein prisvekst på 21 prosent. Det er langt over den generelle prisveksten på matvarer som har vore på 2,3 prosent det siste året.
Truleg kjem den varsla kakaokrisa til å vare i fleire år framover. Årsakene er samansette og handlar mellom anna om klimaendringar, kontraktsfornyingar og kostnadsvekst som påverkar råvareprisen på kakao. I tillegg har det vore ei forseinking på fornying av trea, på grunn av låge prisar fram til 2023, forklarer dagleg leiar og jordbruksanalytikar Christian Anton Smedshaug i Agri analyse.
– Det tek tid å etablere ny kapasitet fordi nye tre tek 3–5 år før dei byrjar å bere, seier han. (©NPK)
