Slik blei festivalstøtta fordelt

Fordelinga blei gjort i eit møte i samfunnsutvalet onsdag denne veka.

Vil ha inn festivalar for matkultur

Det er sett av 856.000 kroner i kulturmidlar for 2025. Kommunedirektøren har tilrådd å fordele midlane ved å gi 330.000 kroner i festivalstøtte, 396.000 kroner i kulturmidlar til lag og organisasjonar og 130.000 kroner til særskilde kulturtiltak gjennom året.

I eit felles framlegg basert på eit framlegg frå Marit Elisabeth Larssen (Sp), gjorde samfunnsutvalet justeringar i denne fordelinga.

I eit samrøystes vedtak gjekk utvalet inn for at kulturmidlane frå og med 2025 og ut kommunestyreperioden blir fordelte med 450.000 kroner til lag og organisasjonar, 300.000 kroner i tilskot til festivalar og 106.000 kroner til særskilde kulturtiltak gjennom året.

Ein eventuell auke i kulturmidlar skal fordelast i tråd med dette mellom ordningane.

Samfunnsutvalet gjekk også inn for at tilskot til festivalar skal omfatta festivalar som er retta inn mot matkultur.

Gjorde nokre endringar

Også når det kom til den konkrete fordelinga til festivalstøtte for 2025, gjorde samfunnsutvalet nokre endringar sett opp imot kommunedirektøren si tilråding.

Utvalet vedtok å tildele støtte til festivalar i Gloppen med denne fordelinga:

Norsk Countrytreff kr 110.000

Gloppen Musikkfest kr 75.000

Glopperock kr 30.000

Fjordblues kr 30.000

Ein ørliten ein kr 30.000

Matamål kr 25.000

Ose Kammerspel får tildelt kr 15.000 frå ordninga særskilde kulturtiltak.