Torine og Ida Kristine instruerte i VM-prosjekt: – Kjekt og lærerikt

– Det er kjekt og lærerikt, seier Torine Langeteig, som går i 3. klasse idrett ved Firda vgs.

Saman med Ida Kristine Rønnekleiv, som også går i 3. klasse på idrettslinja, lærte ho vekk gode teknikkar og tips innan styrketrening til tiandeklassingar ved Gloppen ungdomsskule og Hyen skule i Trivselshallen tysdag.

Fram mot VM i vektløfting i Førde i oktober, skal heile 1500 10.-klassingar i Sogn og Fjordane få lære meir om styrketrening og vektløfting av Firda-elevar og av vektløftarar frå Tambarskjelvar IL.

Vil skape meirverdi

Rolf Kjetil Egge, administrasjonssjef for VM i Førde, fortel at ein ønskjer å skape meirverdi rundt arrangementet.

Skuleprosjektet er ein del av dette.

– Dette er tett kopla mot det som skal skje i Førde, samtidig har ein eit fokus på at styrkjetrening er viktig uansett kva aktivitet ein driv med, seier Egge.

I skuleprosjektet legg dei ikkje berre vekt på sjølve vektløftinga, men har med seg eit større bilete som òg handlar om helse, eit sunt kosthald og ei antidoping-haldning.

Trening, god og sunn mat og kvile er viktige ingrediensar her, peikar Egge på.

– Ein må forstå at ein rein er kropp er den beste kroppen. Det handlar om å trene styrkje, ha tolmod og ikkje ta snarvegar, seier han.

Det store biletet handlar også om at Noreg har ei aldrande befolkning, og at mange framover vil måtte stå lenger i arbeidslivet.

Då er det ikkje dumt med ein sterk kropp og å vere i god fysisk form, og styrkjetrening høver for alle aldrar, viser Egge til.

– Gode vanar når det kjem til styrkjetrening dreg ein med seg heile livet, seier han.

– God førebygging

Langeteig og Rønnekleiv var først ute av Firda-elevane som skal bidra som instruktørar, men framover skal idrettslinjeelevar på ulike klassetrinn få vere med på turneen rundt om i Sogn og Fjordane.

Dei to 3.-klassingane synest det var kjekt å få vere med då startskotet gjekk. På idrettslinja har dei eit eige leiingsfag, der dei lærer om korleis ein blir ein god trenar og instruktør.

Langeteig seier VM-prosjektet er nyttig opp mot dette faget.

Rønnekleiv fortel at idrettselevane testa opplegget sjølve, før dei lærte det vidare til ungdomsskuleelevane tysdag.

Ho peiker på at styrkjetreninga er bra for kropp og skjelett, og noko ein har nytte av heile livet.

– Det er skadeførebyggjande, og ein treng grunnleggjande styrkje i alle idrettar ein driv med, seier Langeteig.

– Heilt fantastisk

Assisterande rektor Magne Larsen ved Firda vgs. er svært glad for samarbeidet skulen no har med VM-arrangøren.

– Det er heilt fantastisk. Det gir oss så mange moglegheiter, seier han.

Også Larsen meiner det er svært nyttig for idrettselevane som har leiingsfag å få prøve seg som instruktørar på denne måten.

– Det blir ein ekstra bonus i dette faget. Det er òg eit pluss å få lov til å vere del av noko større, og få eit eigarskap til det, seier han og legg til:

– Eg trur det gjekk opp for elevane då Rolf Kjetil hadde ein presentasjonen av VM, kor stort det er, seier han.

Larsen synest også det er positivt at skuleprosjektet har med seg eit større perspektiv knytt til folkehelse.

Det er primært idrettslinjeelevar i andre- og tredje klasse som får reise rundt som instruktørar, men det kan også vere at førsteklassingar får bli med.

Når Firda-elevane dei neste månadene skal rundt til ulike ungdomsskular, er det dessutan eit fint høve til å òg vise fram idrettslinja, understrekar Larsen.

Eit samarbeidsprosjekt

Prosjektet som no skal turnere Sogn og Fjordane rundt, er eit samarbeid mellom Antidoping Noreg, Sunn idrett, Firda vgs. og VM i vektløfting 2025.

Det er vektløftar Julia Jordanger Loen frå Gloppen som leiar prosjektet, og ho har mellom andre med seg Ine Andersson og Tine Pedersen, kollegaer frå landslaget.

Jordanger Loen synest det er kjekt å sjå at prosjektet no er i gang.

– Det er spennande å sjå at planen og programmet flyt fint, og det ser ut som elevane kosar seg. Det blir kjekt når vi skal rundt og tilby dette til fleire 10.-klassingar, seier ho.

Vektløftaren trur prosjektet gjer at fleire får auga opp for meisterskapen som skal arrangerast i Førde, og Jordanger Loen håpar mange kjem dit og er med på å lage god stemning i Førdehuset.

Ikkje minst håpar ho at prosjektet kan bidra til rekruttering til sporten.

– Er vi heldige, er det fleire som kan tenkje seg å begynne med vektløfting, seier Julia Jordanger Loen.