Vegar kan bli stengde på kort varsel
Det vert framleis svært krevjande vêr- og føreforhold på Vestlandet og i Midt-Noreg det neste døgnet. Årsaka er mykje regn, vind, og omslag til mildvêr i fjellet
Varsom.no har sendt ut ei rekkje farevarsel på raudt og oransje nivå som allereie påverkar situasjonen på vegane. Slik vil det også halde fram det neste døgnet, skriv Statens vegvesen i ei pressemelding onsdag ettermiddag.
Varsla gjeld mellom anna fare for mykje regn, snøskred, jord-, sørpe og flaumskred, og dessutan mykje vind for fylka Rogaland, Vestland, Møre og Romsdal og Trøndelag. Omslag til mildvêr i fjellet i Sør-Noreg vil gjere situasjonen endå meir krevjande.
Annonse
– Vegar, bruer og fjellovergangar både på riks- og fylkesvegnettet kan bli stengde på kort varsel, også preventivt, for å unngå alvorlege hendingar. Utsette ferjestrekningar kan bli stengde i periodar med sterk vind. Trafikantane bør vurdere om og når dei bør køyre, og førebu seg godt, seier Svenn Egil Finden, avdelingsdirektør i vegvesenet, i pressemeldinga.
Sjekk vêr- og føremeldingar før du køyrer
– Trafikantar som må ut på vegane i dei aktuelle områda bør sørgje for å vere godt førebudde. Sjekk vær- og føremeldingar, og hald deg oppdatert undervegs, oppmodar Finden.
– Det beste tipset eg har er å laste ned appen Vegvesen trafikk, og aktivere varsel for området du ferdast i. Då er du alltid oppdatert på dei viktigaste trafikkmeldingane som er relevante for deg, seier han.
Annonse
Finden ber også trafikantar ta ekstra forholdsreglar, med tanke på at både vegar, bruer og fjellovergangar kan bli stengde på kort varsel:
– Syt for at bilen har full tank eller fullt batteri, og ta med ekstra drikke, mat og varme klede. Då er du betre rusta viss du blir ståande i kø.
