Viktig å leggje til rette for godt samarbeid
Vi har dyktige og kunnskapsrike pedagogiske leiarar i barnehagane i Gloppen, og det er viktig å tilrettelegge for eit godt samarbeid slik at vi kan utvikle oss saman.
Her er siste nytt frå barnehagane i Gloppen:
Opptaket i 2025
Annonse
1. mars gjekk fristen for å søkje om barnehageplass i Gloppen kommune ut. Kommunen har eit samordna opptak, og alle søknader vert behandla i Vigilo. Leiarane i barnehagane møtast til opptaksmøte saman med kommunalsjef for oppvekst. I møtet får vi ei oversikt over søkjarane, og arbeidet med å tildele plassar tek til.
Målet er å imøtekome alle ønske. Sjølv om det kan oppstå nokre vanskar, opplever vi at vi klarer å finne løysingar til slutt. I år er det fleire nye familiar som flyttar til Gloppen. Det er gledeleg, og ekstra kjekt er det at ikkje alle vil bu i sentrum.
Stolte av barnehagen
Therese van Hallas skriv i innlegget til FT sist veke at fleire i hennar omgangskrets er stolte av barnehagen sin og at alle er fornøgde og glade for jobben personalet gjer i barnehagane i Gloppen. Dette er veldig fint for barnehagetilsette å lese. Takk for fine ord, Therese!
Annonse
Det er også vårt inntrykk at foreldra er veldig fornøgde med jobben som vert gjort i barnehagane. Dette viser også tidlegare kartleggingar. Det er både viktig og nødvendig med stor grad av tillit for å få til gode relasjonar og eit godt foreldresamarbeid.
Barnehagedagen
Tysdag 11. mars var det barnehagedagen med temaet "La leiken leve!" - eit viktig tema å diskutere.
Barnehagane markerte dagen litt ulikt. Sjølv om barnehagane jobbar med temaet dagleg, kan det likevel vere viktig å løfte ein liten del av arbeidet denne dagen, gjere litt stas på personalet, heise flagget og markere kor viktig temaet er overfor foreldre og ålmenta. For leik er ein samansett kompetanse som er langt viktigare enn ein kanskje er klar over.
Vi ser ofte overskrifter i avisene om leik og utfordringar knytt til at vilkåra for leiken har endra seg. Kva har skjedd dei siste 20 åra?
Døme på overskrifter:
Annonse
"Norske barn leker mindre ute i naturen. Spesielt noen grupper er forskerne bekymret for." (Aftenposten)
"Lege og hjerneforsker: Bekymret for konsekvensene av at barn leker mindre." (Aftenposten)
"Hvis skolen skal forberede barn og unge på fremtidens arbeidsliv, må de få leke mer." (NRK)
"Er lærerstyrt lek egentlig lek? Det syns ikke nødvendigvis skolestarterne. Mer frilek i skolen vil kunne styrke klassemiljøet og fellesskapet, mener forsker." (Gemini, forskningsnytt)
Det er interessant å diskutere korleis endringane i samfunnet påverkar barna sin leik. Det er nettopp difor barnehagedagen er viktig - vi treng å stoppe opp litt og tenke på kva det betyr å LA LEIKEN LEVE!
REKOMP
Annonse
REKOMP er ei regional ordning for kompetanseutvikling i barnehagen.
Alle barnehagane i Gloppen samarbeider med kommunen og Høgskulen på Vestlandet om ei felles satsing i perioden 2024-2026. Vi ønskjer å framheve den pedagogiske leiaren på avdelinga.
Dei har eit allsidig arbeid med mange arbeidsoppgåver, og er heilt sentrale for den pedagogiske kvaliteten i barnehagane. Krav, forventningar og mykje nytt lovverk i barnehagen krev meir av dei pedagogiske leiarane. Ved å fokusere på deira leiarrolle, og bidra til eit kompetanseløft, er ønsket at dei skal kjenne seg tryggare i yrkesrolla og dermed vere tydelegare i yrkesutøvinga.
Sjølvsagt skulle vi ønske at sentrale myndigheiter kunne hjelpe pedagogane med betre arbeidsvilkår, slik at pedagogane får jobba godt med eigenutvikling i leiarrolla og sikre god kvalitet på sine avdelingar.
Vi har dyktige og kunnskapsrike pedagogiske leiarar i Gloppen, og det er difor viktig å tilrettelegge for eit godt samarbeid slik at vi kan utvikle oss saman.
Nettverkssamlingar
Annonse
Arbeidsgruppa for nettverkssamlingar planlegg arbeidet og framdrifta. Denne gruppa består av representantar frå pedagoggruppa, styrarane i private og kommunale barnehagar, rådgjevar for oppvekst og høgskulen.
Dei pedagogiske leiarane i alle barnehagane møtast til nettverkssamlingar. Desse samlingane har eit fagleg fokus der vi jobbar etter DUEN-modellen til Miles (1986) for implementering av ny og endra praksis.
Mellom kvar samling jobbar dei pedagogiske leiarane med utviklingsarbeidet i eigen barnehage.
Barna i barnehagen er heldige som har engasjerte og motiverte pedagogiske leiarar som ønskjer at personalet i barnehagen skal auke kompetansen sin og utvikle seg. På denne måten får barna gode og kompetente vaksne å vere saman med, og kvaliteten på arbeidet i Gloppen-barnehagane aukar.
