Fannemel leier hoppgutane etter at vikaren trekte seg
Anders Fannemel steppar inn som mellombels hovudtrenar for dei norske hoppherrane etter at Bine Norcic snudde i siste liten.
Det stadfestar mediekontakt Steinar Bjerkmann i Skiforbundet til NRK.
– Veldig glad for at Fannemel stiller opp som hovudtrenar, seier Bjerkmann.
Annonse
Dermed blir det ikkje Norcic som skal leie hoppherrane. Slovenaren forklarer i eit intervju med Siol.net at han reiser heim.
– Eg sa til dei at eg ville fullføre jobben med gutane mine frå B-laget. Dei sa eg skulle ta over A-laget, men eg sa klart frå at dei måtte ordne opp i situasjonen sjølv, seier Norcic.
43-åringen foreslo å trekkje heile det norske laget frå Raw Air-rennet i Holmenkollen torsdag. Han meiner at det ikkje er trygt å la hopparane setje utfor med alt det utanomsportslege rundt.
– Eg veit at dette er renn på heimebane, men situasjonen er ekstremt vanskeleg for laget. Det kjem til å vere det same i Lahti og Planica. Presset på hopparane vil vere stort, og nokre av dei har ikkje skuld i dette, seier han.
Annonse
TV 2 omtalte intervjuet først i Noreg.
«Galskap»
Tidlegare i veka sa Norcic til Sportal at han fekk «feber og nervøst samanbrot» av dressjukset i VM.
No beskriv han situasjonen rundt det norske laget som «galskap».
– Då vi kom, vart vi bokstavleg talt angripne av journalistar. Nokre gøymde seg. Eg vil ikkje stikke hovudet fram, seier Norcic.
Norcic fekk trenaroppgåva tidlegare i veka etter at landslagstrenar Magnus Brevig vart suspendert.
Annonse
Det vart han saman med assistent Thomas Lobben og skreddar Adrian Livelten etter at dei innrømde å ha manipulert Marius Lindvik og Johann Forfangs dressar til storbakkerennet i VM i Granåsen.
Dei norske hopparane vart diska frå høvesvis 2.- og 5.-plass. Sidan har også dei vorte suspenderte av FIS.
Rett på jobb
Fannemel skal i aksjon som hovudtrenar allereie torsdag når Raw Air startar i Holmenkollen. Til helga går turen vidare til skiflygingsbakken i Vikersund.
Hornindal-guten har ein imponerande hoppkarriere bak seg med mellom anna gull i både ski- og skiflyging-VM. I tillegg tok han fire individuelle verdscupsigrar.
Fannemel avslutta den aktive karrieren sin i 2023. (©NPK)
