GHK møtte Fyllingen 2

Laurdag vann GHK den første bortekampen for helga, då laget møtte NHHI i Lehmkuhlhallen. Søndag møtte glopparane Fyllingen 2 i Framohallen.

– Mange gode spelarar

Til pause leia Fyllingen 16–13. Sluttresultatet blei 35–28 til heimelaget.

Spelande trenar Ørjan Horne Sundal seier kampen gjekk litt opp og ned.

– Vi stilte med berre tre bakspelarar, og den eine fekk skade etter kring 20 minutt. Vi måtte spele med vingar på backplass resten av kampen, fortel han.

Sundal fortel at Fyllingen 2 har mange gode spelarar.

– Laget rykte ned frå andredivisjon i fjor, og har mange spelarar som også speler på andredivisjonslaget til Fyllingen, seier Sundal.

– Vi blir litt for dårlege i duellspelet defensivt. Men vi leverer ein grei prestasjon ut frå føresetnadane.

– Ein veldig bra kamp

Laurdag fekk glopparane med seg poeng då dei slo NHHI med 30–25.

– Det var ein veldig bra kamp. Vi starta i hundre. Vi fekk stogga dei i forsvar, og sprang inn mange lette mål i kontra i starten, seier Sundal.

Gloppen leia ganske mykje tidleg i kampen, men slapp seg meir ned mot pause, fortel han. På det meste leia GHK med opp mot åtte mål i første omgang.

Andre omgang starta litt motsett av den første omgangen.

– Men vi klarer å omstille oss, står bra i forsvar og får sprunge inn nokre lette mål. Det var ein veldig bra siger, med godt forsvarsspel og bra tempo, seier Sundal.

Alt i alt kan Gloppen seie seg fornøgd med dei to bortekampane i helga, meiner han.

– Det var ein veldig bra kamp i går, og ein bra prestasjon i dag, sjølv om vi tapte.

Slik gjekk det med GHK i Bergen

Kampfakta

Fyllingen 2 – Gloppen: 35–28 (16–13)

3. divisjon herrar

Framohallen 2

Gloppen: Marcel Piwko, Sindre Fjellestad (3), Ole Jin Woo Hogrenning Ravnestad, Håvard Kvalsvik Haugen (2), Jørgen Aagaard Arnestad (1), Vegard Elvebakk Engeset (6), Sondre Sårheim Søreide, Ørjan Horne Sundal (11), Nimrod Isaac-Habtemariam, Roar Willumsen (1), Carl Strand Breidablik (4)

Utvisingar: GHK: 5x2min.,

Dommarar: Preben Træen Andersen og Ruben Ekren